Ձեր վստահելի աղբյուրը

Հանրապետությունում խոզի գրիպի դեմ հատկացվող «Տամիֆլյու» դեղամիջոցը հիվանդին հատկացվում է պետպատվերի շրջանակներում` անվճար և միայն բժշկի նշանակմամբ: Բացի այդ` ցանկացած պոլիկլինիկա, բուժհաստատություն դիմած քաղաքացին անվճար հետազոտության և բուժման իրավունք ունի: Այսօր այս մասին ևս մեկ անգամ շեշտեցին առողջապահության նախարարության ներկայացուցիչներն ու հանրապետության գլխավոր ինֆեկցիոնիստը:

Նախարարության բուժվարչության պետ Վահան Պողոսյանը նշեց, որ հանրապետությունում հարկավոր չէ «պանիկա» ստեղծել, եթե նույնիսկ սեզոնային գրիպի դեմ դեղերը վերջացել են: «Այնպիսի իրավիճակ չի ստեղծվել, թե հիվանդների թիվը շատ է ու դեղատներում համապատասխան դեղեր չկան: Ո՛չ, նման բան չկա: Թող քաղաքացին հանգիստ նստի իր տանը, նախանշանների դեպքում թող ապահովի ուրիշների հետ քիչ շփումն ու դիմի մասնագետի»,- ասաց Վ. Պողոսյանը: Բուժվարչության պետն, ի վերջո, խորհուրդ տվեց «կանչ գրանցել», որ շտապօգնության մասնագետները գան և տեղում պարզեն` արժե՞ ինֆեկցիոն հիվանդանոց դիմել, թե՞ ոչ:

Ինչ վերաբերում է դեղերի գնային քաղաքականությանը, ապա Վ. Պետրոսյանը նշեց, որ նախարարը դիմել է Տնտեսական մրցակցության պաշտպանության պետական հանձնաժողովին` ուսումնասիրելու շուկան ու կոնկրետ միջոցներ ձեռնարկելու համար: Բացի այդ, նա հավաստիացրեց, որ առողջապահության նախարարությունը «թույլ չի տալու» ներկրողներին այսպիսի հարցի շուրջ արհեստական լարվածություն ստեղծել ու գերշահույթ ապահովել: «Բնականաբար, այսպիսի ժամանակհատվածներում դեղորայք ներկրող ընկերությունները պետք է փորձեն առիթից օգտվել` շահույթներ ապահովեն իրենց համար, բայց նախարարությունը շատ լուրջ միջոցներ է ձեռնարկել»,- հաստատեց նա ու ավելացրեց, որ սա համաժողովրդական խնդիր է ու հենց այդ ներկրողներն էլ հասարակության մի մասնիկն են, և չպետք է ստեղծված իրավիճակից օգտվել:

Նա նաև նշեց, որ հակառակ դեպքում, դեղատներում այդ դեղերի վաճառքը հնարավոր կլինի իրականացնել միայն դեղատոմսերի միջոցով:

Վերջում, բուժվարչության պետը նշեց, որ հարկավոր չէ դիմել դեղատուն ու նշել, թե դեղերը թանկացել են: «Ինչու՞ եք դիմում դեղատուն, դիմեք պոլիկլինիկա և ստացեք ձեզ հասանելիք անվճար բուժօգնությունը»,- եզրափակեց բուժվարչության պետը: